So isch bei de Schwobeleut:
Do send bloss de Helle gscheit,
Ond em ganze Schwobaland
Fehlts de Domme am Verstand.
We-mr domm ist, des ist so:
Selber spürt mr nex drvo`,
Ond so hot en älle Toil
D Dommheit uf de Gasse foil.
Osre Gscheite onterdesse',
Die hent meistens s Maul vergesse',
Ond se bhaltet lediglich
Lieber ihrn Verstand fer sich.
Andre Menscha hent faif Senna,
Mir Schwoba hent bloss viere
Ond kommet so guat aus drmit
Wia selle mit de ihre.
Gucka, haira, spüra, schmecka -
Maih brauchts et, jo währle,
Ond dear mo bei os riecha tuat,
Des ist a wüaster Kerle!
S ist wohr, ond oser alter Könich
hots schao gsait: Dr Schwob schwätzt wenich.
Ond wenn r schwätzt, druf kö't mr wetta,
Sait r zairsta "noi" ond "eta".
Oigasenniche Kerle send se,
Donderschlächtige Dickköpf hent se,
Om koi Welt et nochgea tent se,
Mit am Kopf durch dMauer went se.
Mit Grobheit Kommst et weit,
Do ist dr Schwob stärker;
Ond schempfa
Des ka'-n-ear ärger.
Mit guate Wörtla, Schlückla ond Stückla
Ka' mr os Schwoba Om da Fenger wickla.
