Meglenga
von Einst
(von Annemarie Pflugfelder ~ 2006)
I hau da amol kurz
beschrieba, was von dr Jugend mir isch blieba,
mo no jeder jeden hat kennt
ond au gwisst hat, mo se herkomma send,
vielleicht ka ne a Fraid
uich macha, ja mancher wurd au drieber lacha,
wen e mr’s schier nemme denga
ka, a bissle erennere me no dra,
ja i ka des gar net sa, was
Meglenga von einscht mir war.
Mo mr no uff dr Acker gloffa
ischt ond von Hand gschproid hat dr Mischt.
mo mr gfahra isch mit dr
Scheßa, ja des sed no Zeida gwesa,
em Goaschtleng hat no koa
Schtroßaliecht brennt,
do hat mr Angscht keht no
als Kend,
mo dr Eiseles Fritz no
d'Stuir kassiert,
ond no ausgruafa hat, was
älles bassiert,
mo d'Gees no en dr Reicherts
Gass romdappt send,
mo d'Kender en dr Lammgass
Fuaßball gspielt hend,
mo s' MiIlichhäusle no dr
Treffponkt war für jonge ond für alte Paar,
mo d'Baura mit ihre Kiah ens
Gieka Hof vorschwonda send,
ond mr neigspickt hat als
Kend.
mo s'Bachäusle no gtanda
isch,
ond mr sei Brot no kriagt
hat frisch,
en de sieba Wenkl
Schlupfetles gmacht,
des isch bsonders schee gwea
en dr Nacht,
mo mr gnöpfelt hat als Kend,
ond d'Leit schier uff
d'PaIme send.
Bei dr Roßnagels Marta mr
Dropfa ond Säftla hat kenna hau,
wenn's oim äls gwea isch a
bißle flau,
oder en's Koppahöfers Lädle,
mo kriagt hascht was gwellt,
a Zuckerle für wenig Geld,
mo s' Rosele vor am Haus
ghockt ischt,
ond gsonga hat dr Schtroma
Fritz,
mo dr Walters Kiafor no
gmoschdet hat,
on'd Biddana gschtanda send
ondram Dach,
mo dr Schneiderschneider uff
am Disch ghockt ischt.
ond gwart hat bis er ebbes
nuis vordwischt.
Mo's Eis bloß sonntichs gea
hat,
für fenf Pfenneng, hat mr no gschbart,
mo d' Gaulsfuhrwerk durch d'
Stroßa send,
on'd Roßbollasammler schau
gwardet hend,
wenn dr' Häfelesma em FIecka
hat gschellt,
ond kaufa hasch kenna, was
hasch gwellt,
mo mr em Sai draußa
Schlittschua gfahra isch,
solang bis Nacht worda isch,
on Schliddagfahra em
Hohlgraba domma,
ohne Schlittschualoider
bischt schier net rakomma,
bisch schnell gwea ond au
keck,
bisch komma bis zom Schtäles
Beck.
Mo's Kenderschiale no am
Bach donna gwea isch,
on äls neigfloga bischt mit
a'ma Kloadle ganz frisch,
odr wenn'e an dr Julius
denk,
des wois e no als Kend,
"Ein Sträußchen am
Hute, der Stock in der Hand"
so ischer bestemmd no viele
bekannt,
on dr' Prenza Paul mit seine
Beck,
ja des Gschmäckle isch nia
von em weg.
Odr'Schobers Muadr ohne Zeh,
dui hat vielleicht lacha
kenna,
oh war des schee,
hascht vom Lippa- Metzger
wella ebbes wissa,
dui Antwort hat de schier
vorrissa.
ond hat amol d'Sirena dau,
Ruafs Emil sein Rabba glau,
oms Eck nom gsaut ens
Magazin
dr erste gwea von woisch
wieviel,
odr' wenn se Maia gschteckt
hennt omd Wedd,
on de ganz Nachd send net
ens Bett,
mo dia Kerle no om dia Mädla
hennt dau,
on a jeder gmoint bat er
miaßt se hau.
ja des send no Zeita gwea,
i moin els grad, i däts no seha.