Werner Veidt

I möcht amol wieder e Lausbua sei

I möcht amol wieder e Lausbua sei,
ond meine Schuelfreund wäret d'rbei,
n o dät i mit dene Indianerles schbiele
ond mit em Pfeil nach de Schbatze ziele.
I möcht wieder o'reife Äpfel esse,
am "Abe" drauße Karl-May-Büecher lese
ond in d'r Küche d' Schüssle ausschlecke,
d'r Großmutter ihr Gebiß verschtecke.
Bei allem Blödsinn wär id'rbei,
i möcht amol wieder e Lausbue sei.

I möcht amol wieder barfueß laufe,
ond mir für zeah Pfennig Bäredreck kaufe,
auf's Nachbars Baum drobe d' Kirsche stenze,
ond in d'r Schuel de Onterricht schwänze.
I möcht mi wieder am Neck'r romdrücke,
im Damebad durch d'Astlöcher schpicke.
I möcht amol wieder d'Hose verreiße,
i möcht amol wieder ins Bett nei'schpringe.
Bei allem Blödsinn wär i d'rbei,
i möcht amol wieder e Lausbue sei.

I möcht amol wieder mit Roßbolle schmeiße,
de Maiekäfer de Kopf ra' beiße,
d'r Katz von meiner Tante hinte
en Luftballon an de Schwanz na'binde,
i möcht zu meim Bäsle "Lumpemensch" sage,
i möcht ere wieder de' Ranze verschlage,
de ganze Geschichtsonterricht verhonze,
und ein Herr Lehrer in Hut nei' spucke.
Bei allem Blödsinn wär i d'rbei,
i möcht amol wieder e Lausbue sei.

I möcht amol wieder im Rege romwate,
ond meine Füeß im Gülleloch bade,
d' Schlüsellöcher an unsere Schuelhaustüre,
inne ond auße mit Leim verschmieren,
mei weiß Matroseblüsle a'ziege,
ond damit in frische Kuehdreck neifliege,
de Meiers Fritz an de Löffel fasse,
z'erscht hochhebe - ond no plotze lasse.
Bei allem Blödsinn wär i d'rbei,
i möcht amol wieder e Lausbue sei.

Eins aber, do därfscht mi net auslache,
eins möcht i als Lausbue doch nemme mache:
Mei Mueder, dui möcht i nemme so ploge,
do wär i gwiß nemme o'gezoge.
I dät ihre helfe d'Wäsch aufhänge,
i dät ihre d' Kohle vom Keller' rauf bringe.
Ond wenn se was sage dät, no dät i schpringe.
Weihnachte möcht i se au bescheere,
do würd`i eifach rnei Schparbüchsle leere,
nonter zom Herr Apotheker laufe,
ond für zwanzig Pfennig en Hautkrern kaufe.
Ond frogt sie mi no: "Für wen isch denn des, Kend?"
No sag i: "Für deine abgschaffte Händ!"
Komm. Mamme, jetzt wölle mr's glei probiere."
No dät i ihr d'Händ mit Hautkrem ei'schmiere.
Ond deshalb, net wege dem Blödsinn allei,
möchte i amol wieder e Lausbua sei.

das Stuagerter schwäbisch klingt in manchen Tönen anders als das Möglingerische.

bei uns lauten viele Wörter mit a und nicht mit e (laufa, schmiera, kaufa)