Beim Glockaläuta
Früher hen net schau d' Kender a Armbanduhr ghet
on net aloi weaga dr Uhrzeit, - au weaga'm Gebet
hen zo ganz beschtemmte Zeita
d' Glocka müassa vom Kirchturm läuta -
weil d' Leut send ufm Feld dus gwea
on hen oft net amol da Kirchaturm gseah.
Als Kender hen mir em Mesner gholfa,
schau beim erschta Läuta, meischtens am elfa.
D' Schtieaga bisch nufgsaut wia a Katz,
's isch ällamol gwea a mords Rabatz.
Dr Mesner, d' Buaba on d' Mädla
hen zählt on 's Soile zoga.
Nochher hasch nausguckt zo de Lädla
on nagschpuckt hoch em Boga,
wieder d' Schtieaga na, uf oamol gnomma a paar Tritta.
Am viere hot mr zom Veschper glitta,
am Obed no no uf am Märga
zom Ausgruaba vom Schaffa on Werka,
d' Kender hen no vo dr Gass rei müassa.
's Sonntichläuta tuat d' Woch beschlieaßa
's erscht, 's zweit on zom Kirchgang,
dr Mesner hot oim gsait wia lang.
Am Mittag zo dr Chrischtalehr,
do hot mr wella nemme hear,
meischtens hot d' Muatter tribeliert,
weil mir hen ebbes anders em Schild äls gführt.
Au bei de Hauzicha on Leicha
hasch dürfa net vom Mesner weicha,
do hot mr Hefakranz krieagt oder Geld
on selba Tag dürfa dahoim bleiba vom Feld.
Des isch jetzt älles nemme so,
isch des wohl weaga'm Schtondaloh?
I moin, des isch aber wirklich schad,
weil mir hen braucht koin Trimm-Dich-Pfad.
Elektrisch goht heut halt's Geläut, -
d' Kirch goht oifach mit dr Zeit.