Bauer sei
Baura-Arbet isch a Gschäft,
Braucht viel Schwoiß ond härte Kräft.
Stoibhäb muas mr eaba drom
drzua nastao, Dees isch domm.
Bauer sei brengt Sorg ond Müah
Obneds spot ond morgneds früah.
Wär für d' Herrabuaba gsond,
Wüsstet au, wo s' Brot herkommt.
Bauer sei isch oft a Blog;
s' Wetter isch a' baöser Kog.
Wills oium et, no geagrets Schmied,
Aeb mr ds Heu uf Schoche gsieht.
Bauer sei, des isch a Strof,
Wenn em Hoilscha, wenn em Grof
Acker isch ond Woiza-n au
Ond de Baura's Gschäft ond Strao.
Bauer sei, dees isch a Ehr,
Bauer sei, wär mei Begehr;
Hebt dr Baur a Arbet an,
Schafft dr Herrgott weiter dra.
Bauer sei des isch a Freid:
Wenn dr Woiza Ähra trait,
Ziagt r hälenga ond sacht
d' Kappa ra vor sore Pracht.