Bauer sei  

  Bauer sei, wär mei Begehr,

i wist net war scheener wär,

ondram blooa Hemmelszelt

als a‘ goldgeals Woazafeld.

Wenn em morgnets d‘ Wachtel schreit,

gôt dr Bauer naus ond schneid.

Horch wias luschtig leit ond klengelt

Wenn dr  Bauer wetzt ond dengelt.

Luag, wia flenk dr loadschich Michel

Etzt hantiert mit seira Sichel

Ond dia Mädla hendadrai

Sammlet ganze Ärm voll ei.

Jô on guck au no wia sauber

Heidanei, des sich a Naot

Hôôr so gold wia Woazaähra

On wia isch des Leible raot.

On wia bebberet dai Mäule

EvaMeng ond Anna-Mreile

Ond em ganza Zeata klengelts,

lachts ond schetterts, wetzt ond dengelts.

Übrerm Feldweag, uff de haas

grille grille grillts em Gras.

S‘ Rebheale em Haberacker

leitet seine Butzawacker.

D‘ Lerch steigt em Loaderle

bis nuff en Hemmel schier

 lasst sei Trillermuster laos

ond hat doch koa Klavier.

S‘ schaffa mag koa Hitz verleida,

s‘ veschpera gôt em härtschta Schwoiß.

Isch mr fertig mit em schneida

sitzt mr na ond veschpert ois.

S’ verschpera macht se hentadruss

au beim Schneida guat als Schluss.

Kämt des verschpera vornarei

Nô wett älles Bauer sei.